Derrota dura en Morón nun partido para esquecer

O Aircargobooking Ourense sufriu unha dolorosa derrota na súa visita ao CB Morón, caendo por 89-59 ante o colista da competición. O equipo local, que chegaba con só unha vitoria en 23 xornadas, mostrouse moi superior desde o inicio e non deu opcións aos nosos.

O primeiro cuarto xa marcou a tendencia do encontro. A falta de acerto, as perdas de balón e a debilidade defensiva permitiron que o Morón tomase vantaxe cun 19-12 que, sen ser definitivo, comezaba a xerar inquedanza.

O segundo cuarto foi un verdadeiro pesadelo para o Aircargobooking Ourense. A desconexión foi total e os locais, con moita intensidade e efectividade, aproveitaron cada erro para ampliar a diferenza cun parcial de 25-10 que deixaba o marcador en 44-22 ao descanso.

Na reanudación, o equipo intentou reaccionar, pero as continuas perdas de balón e a falta de claridade en ataque impediron calquera intento de remontada. O Morón seguiu dominando e asinou un terceiro cuarto demoledor (30-20) que sentenciaba o partido. Xa co encontro decidido, o Aircargobooking Ourense mellorou lixeiramente no último cuarto (15-17), pero sen que iso servise para maquillar a imaxe deixada.

Unha derrota dolorosa que debe servir para facer autocrítica. Toca levantarse e traballar para recuperar a mellor versión do equipo para os próximos compromisos, comezando co derbi deste sábado ante Monbús Obradoiro.

Fotos: Pablo Martín