Kentwan Smith novo xogador do Club Ourense Baloncesto

O Club Ourense Baloncesto pechou a fichaxe do xogador bahamés Kentwan Smith, ala-pivote de 2,03 metros e ampla traxectoria internacional, que chega procedente do Anorthosis Famagusta de Chipre. O novo interior do COB vén de asinar unha destacada tempada tanto na liga regular chipriota como na FIBA Europe Cup, onde foi un dos xogadores máis determinantes do seu equipo.

Na competición continental, Smith disputou 8 encontros cos chipriotas, nos que promediu 14,1 puntos, 8,3 rebotes e 2 asistencias por partido, con máis de 18 de valoración media. Estes rexistros convertérono no máximo anotador e reboteador do Anorthosis, demostrando o seu impacto ofensivo e defensivo en encontros de alto nivel. A súa capacidade para anotar en distintas situacións, xunto coa súa presenza física e reboteadora, fixérono clave nas rotacións do equipo chipriota.

Na liga regular de Chipre, Smith tamén foi unha das pezas máis importantes do Anorthosis, con medias de 12,9 puntos, 7,3 rebotes, 2,2 asistencias e 1,1 tapóns por partido en 21 encontros disputados. Foi o segundo xogador máis valorado do plantel e liderou ao equipo en rebotes totais, mantendo unha boa eficiencia en tiro de dous puntos e achegando solidez defensiva baixo a pintura.

Formado na NCAA, Kentwan Smith desenvolveu a súa carreira profesional en ligas de Europa como a romanesa, finlandesa, checa, eslovaca, danesa, sueca e chipriota. Ademais, é internacional absoluto coa selección das Bahamas, coa que participou en distintas fiestras FIBA. Na clasificación para a AmeriCup 2025 promediu 6,2 puntos e 4,4 rebotes, mentres que nas xanelas para o Mundial 2023 asinou 9,1 puntos e 5,1 rebotes por encontro. Tamén formou parte do histórico equipo bahamés que en 2023 eliminou a Arxentina no preclasificatorio olímpico, compartindo convocatoria con xogadores NBA.

Smith chega a Ourense para reforzar a posición de interior, achegando experiencia, versatilidade e capacidade física. O xogador destaca pola súa mobilidade, lectura do xogo sen balón e presenza no rebote. Coa súa chegada, o club ourensán continúa perfilando o seu plantel para a tempada 2025/26, cun xogador que combina calidade individual, experiencia internacional e rendemento contrastado tanto en liga como en competición europea.

AS VERBAS DE MONCHO

Kentwan é un xogador intelixente, con experiencia internacional que compite con intensidade e disciplina táctica. É un xogador ideal en sistemas onde os interiores deben correr e abrir a cancha. Ademais destaca a súa capacidade no pick and pop, excelente timing e lectura para saír ao perímetro tras un bloqueo, e lembra que con un 46 % de acerto en tiros de tres, Kentwan é unha ameaza real para as defensas rivais.

VOLVEREMOS, E TI XA ESTABAS